فلسطیني ګوندونه په قاهره کې سره راټول شول او د پارلماني، ولسمشرۍ او ملي شورا په ټاکنو یې موافقه وکړه. ایا دا ټاکنې به هم لکه تېر ځل د یهودو د قوي کولو او د فلسطین د موضوع د نرمولو لپاره یو بل نوی فصل وي؟

دا ټاکنې له شاوخوا سیاسي حالاتو نه شي خلاصیدای او له دغو لاندې حالتونو سره تړاو درلودلای شي:

۱. د امریکا د دولت پلان، تر څو خپلې ګټي خوندي کړي، د یهودو دولت وساتي او د تسلیمیدو خبري بیرته پیل کړي.

۲. د الله او د هغه له رسول صلی الله علیه وسلم  سره  د عربي هېوادونو خیانت او له یهودو سره نرمښت.

۳. د الله تعالی له دښمن امریکا سره د جوردان امنیتي تړون؛ هغه چې په ترڅ کې یې امریکا تر پنځلس زیاتو ځمکني، بحري او هوایي اډو ته لاره ومونده او سربېره پر دې یې امریکایې ځواکونو ته په جوردان کې د ازاد تګ راتګ اجازه ورکړه. د امریکا په واسطه د جوردان اشغال؛ د هغه پلان او هدف بر اساس و، چې امریکا په سیمه کې د خپلو ګټو او خپل تربیه شوي اولاد اسراییل د ساتلو لپاره یې ترتیب کړی و.

۴. د قوي دولتونو په واسطه پر فلسطیني ګوندونو فشار راوستل، څو د فلسطین له ازادۍ سازمان سره یو ځای شي، هغه چئ اکثرو یې فلسطین له لاسه ورکړی او له یهودو سره یې خبرواترو او سوله  ییزه لاره انتخاب کړې ده.

۵. د دغو غونډو ترتیبات او ټاکنو ته د ګوندونو رضا کول د الله سبحانه وتعالی او دهغه د رسول صلی الله علیه وسلم د دښمن او د امریکا لاسپوڅي السیسي لخوا تر سره شول. 

د دې منشا تر شا به د فلسطین ټاکنې تر سره شي او د فلسطین د نرمولو موضوع د امریکا په نوې اداره او یوه نوي پړاو کې ده، چې  د ټرمپ له پلان سره له یو څو جزیي مواردو پرته چنداني توپیر نه لري. خلاصه غواړي مسجد القصا ګډ نهاد جوړ کړي او غربي تراټه کې د یهودو له دولت سره  ځینې سیمې وړګدې او په زور یا په رضا د غزې د ګوندونو بې وسلې کول دي. له دې سره سره به د خلیج دولتونو او یهودو یووالی هم جوړ شي، چې جوردان او مصر به پکي شامل وي. دا به مناسبه نه وي چي د فلسیطن د ازادۍ سازمان هغه خیانت هېر شي، چې د دې سپیڅلې خاورې زیاته برخه یې یهودو ته وړکړه، د اوسلو د موافقي تر چتر لاندې او امنیتي همکاریو او بې ګټو خبرواترو په نتیجه کې په غربې تراټه کې یهود په بې‌سارې توګه ځای پر ځای شول او په دې سره یې دا ټولو ته واضح کړه، چې د فلسطین حکومت خبرواترو ته غاړه ایښې او د عباس-المرت کړنې خو ټولو ته معلومي دي.

دا هغه سیاسي حقیقت و، چې تر شا به یې د فلسطین ټاکنې تر سره شي. دا د اسلام د دښمنانو لخوا  داسې پلان شوي، چې که هر څوک ټاکنې وګټي بیا به هم دوی خپله موخه لاسته راوړي. د دغو ټاکنو شرطونه دا دي، چې یو داسې فلسطیني حکومت واک ته ورسیږي، چې هغه له یهودو سره امنیتي همکارۍ  جایز وبولي، د اسلام دښمن ته کار وکړي او د هغو د کارونو د ذمه‌دارۍ اخیستلو لپاره په سیمه کې یو لاس پوځي دولت جوړکړي او داسې حرکتونه او سازمانونه، چې د دوی تر چتر لاندې به کار کوي، رامنځ ته کړي؛ هغه چې د دوی د چټلو پیسو په زور به ساتل کیږي، د فلسطین ټاکنې بل څه نه دي، مګر د اسلام د دښمن وسیله او اسباب او که د دوی په ګټه کار کوي، نو بیا دوی هغه ساتي او که یې دا پکې تر سترګو نه شول، نو بیا یې مخه نیسي او که یې پایله د دوی د خوښې سره سمه نه وه، بیا به دوی د ټاکنو پر بل مخ اړولو کې هېڅ څنډ ونه کړي. د استعمار تر چتر لاندې ټاکنې یوازې د اشغال د خدمت او د اسلام د دښمن په ګټه دي.

[وَلَا تَرْكَنُوا إِلَى الَّذِينَ ظَلَمُوا فَتَمَسَّكُمُ النَّارُ وَمَا لَكُمْ مِنْ دُونِ اللَّهِ مِنْ أَوْلِيَاءَ ثُمَّ لَا تُنْصَرُونَ] (هود:۱۱۳)

ژباړه: ددغو ظالمانو لوري ته یو بڅری مه کږیږئ، که نه نو دورخ به مو ونغاړي. تاسي به کوم داسي دوست او سرپرست ونه مومئ چي له الله تعالی څخه مو وژغورلای شي او له هیڅ یو ځای څخه به تاسي ته مرسته ونه رسیږي.

اې د رحمت د خاورې خلکو! موږ د ټاکنو د صلاحیت او استازیتوب خبرې نه کوو. او یا دا چې د هغه څه صلاحیت ورکول، چې الله سبحانه وتعالی منع کړي، ګناه ده او د الله سبحانه وتعالی د قهر سبب ګرځي. یا د هغه قانون جوړونکو شور وو، چې له الله سبحانه وتعالی سره په قانون ایښودو او حکومت کولو کې مجادله  کوي، شرک او د طاغوت قاعده وبولو او دا د وروستۍ ډیموکراسۍ شرم دی، چې  فساد يې د هغه په مور (امریکا) کې ښه څرګند دی. موږ ټاکنو ته له دې زاویې نه دي کتلي، که څه هم هر یو د هغه د حراموالي او په هغه کې د ګډون حراموالي لپاره ثبوت شي. خو موږ یې دلته پر تیاره سیاسي اړخ تمرکز کړی دی، چې د هغه په واسطه د اسلام دښمنان د مسلمانانو او په خاصه توګه د فلسطینیانو پر وړاندې دسیسې جوړوي او خلک که هغه لرې وي که نیږدې په دې پوه شي، چې ان په کمه کچه هم په دې ټاکنو کې ګډون، لوی جرم او ګناه ده، ځکه دا د الله سبحانه وتعالی او د هغه د رسول صلی الله علیه وسلم د دښمانانو لخوا په غولوونکو دسیسو کې ګډون دی.

 اې د رحمت د خاورې خلکو! د الله سبحانه وتعالی دښمن (امریکا) په دې پوهیږي چې اسلامي امت له خپلو زولنو څخه د خلاصون په حال کې دی او پوهیږي چې اسلام د مسلمانانو په زړونو کې د اورغورځونکي په څېر دی او ژر به د دوی پر غلامانو را وخوټیږي او اور به یې د دوی ګټې وسوځوي. د لویو دولتونو غټ مجرمین په دې ښه پوهیږي، چې د خلافت تاسیس یوازې د وخت خبره ده او په دې لاره کې د حزب التحریر جدیت ښه ویني او ځانونه د هغه لپاره تیاروي، هر ځای کې د دعوت کوونکو د نیولو په لټه کې وي او د هغه لپاره موانع ایجادوي، دغه راز فکر کوي، چې په هغه سره به یې مخه ونیسي. د الله تعالی دښمنان غواړي، چې د سرطان دانه (یهود) په اسلامي نړۍ کې مدغم  کړي او د اسلامې هېوادونو د کمزوره کولو لپاره اخته دي. همدارنګه د دوی سیمې یې د جنګ مرکزونه جوړ کړي، څو راپورته نه شي. دوی نه غواړي چې شام دې ارام شي او یا هم یمن په کراره شي او یا هم عراق بیا تسلي پیدا کړي، دا هغه څه دي چې دوی د هغه لپاره په پاکستان، افغانستان او بنګلدیش کې کار کوي. سربېره پر دې د هغو اسلامي هېوادونو، چې په خپل منځ کې اختلافات لري، مخالفې اتحادیې جوړي. د مصر، جوردان او خلیج اتحاد، چې په سر کې به یې یهود وي او د شیعه اتحاد، چې ایران او د هغه طرف داران به پکې وي. په دې باندې د اسلام د د ښمنانو ټینګار دی او فکر کوي، چې په دې سره به دوی اسلام امت وټکوي او د خپل زور او غلامانو لخوا دوی سپک او شرمېدلي پاته کړي. دوی دې دا خوبونه ویني، خو پر نبوي منهج د خلافت راتګ د الله تعالی ژمنه او د نبي کریم صلی الله علیه وسلم زیری دی او الله سبحانه وتعالی هېڅ کله خپله ژمنه نه ماتوي.

په پای کې موږ پر دې ټینګار کوو، چې د فلسطین موضوع یوازې د سیمې، ګوندونو او ملت موضوع نه ده، بلکې دا د ټول امت موضوع ده او د اسلام دښمنان غواړي چې دا موضوع له اسلام او اسلامي امت  څخه جلا کړي. د بیت المقدس ازادول یوازینۍ لاره ده او له دې پرته بله لاره نه لري، نو په دې خاطر خلافت او د هغه بیا تاسیسولو لپاره د امت او پوځ مرستې ته اړتیا لري، تر څو د رسول الله صلی الله علیه وسلم د (اسرا) ځای ازاد کړي. د الله سبحانه وتعالی لپاره جهاد او له امت او پوځ څخه د مرستې غوښتنه د فلسطین د موضوع یوازینۍ لاره ده. دا یوه داسې حللاره ده، چې دیهودو موجودیت په خطر کې اچوي او د هغو دا زوړ او خیرن حکومت نسکوروي. دا یو داسې حرکت دی، چې امت د کامیابۍ خوا ته بیایي او هر څوک چې د نیسبي او انتقالي خبرواترو  او یا د 1967 کال پولو او یا هم پر نړیوالو پریکړو او سیمه ییزو نوښتونو پر حلاره کار کوي. هغه الله سبحانه وتعالی او د هغه رسول صلی الله علیه وسلم ته خاین دی او الله تعالی د هغو کارونه نه خوښوي.

د الله تعالی پر نصرت زموږ باور، زموږ د اېمان له امله دی او پر اسلامي امت او د دې پاکې خاورې پر خلکو زموږ ډاډ پرخپل دین د باور څخه دی. د نبوي منهج پر بنسټ د خلافت بیا راتګ د الله سبجانه وتعالی ژمنه اود رسول الله صلی الله علیه وسلم زېری دی. ټوله نړۍ هیله‌منه ده، چې اسلام به دوی د کپیټلیزم او جنایتکارو حکامو له ظلم څخه وساتي او الله سبحانه وتعالی دې د رسول الله صلی الله علیه وسلم امت او د هغه طرفداران سره په اتفاق کړي. د مسلمانانو پوځونه به بیت المقدس ته په داسې حال کې داخل شي، چې د رسول الله صلی الله علیه وسلم د خیبر د نیولو تکبیرات به وایې. «اللَّهُ أَكْبَرُ، اللَّهُ أَكْبَرُ، خَرِبَتْ خَيْبَرُ، إِنَّا إِذَا نَزَلْنَا بِسَاحَةِ قَوْمٍ ﴿فَسَاءَ صَبَاحُ المُنْذَرِينَ﴾» الله اکبر! الله اکبر! خیبر تباه شوی او هر کله چې موږ دښمن ته د جنګ لپاره ورشو، نو بیا به د هغو لپاره چې موږ خبر کړی وو، ډېر ناوړه حالت وی. (البخاري) د الله تعالی دین به تر هغو خپریږي، څو چې  شپې او ورځې ته ورسیري. امام احمد د صحیح احادیثو له لړۍ څخه  د تمیم الداري رضی الله عنه حدیث راخیستی، چې ویل یې ما واورېدل چې نبي کریم صلی الله علیه وسلم وویل:

«لَيَبْلُغَنَّ هَذَا الْأَمْرُ مَا بَلَغَ اللَّيْلُ وَالنَّهَارُ، وَلَا يَتْرُكُ اللهُ بَيْتَ مَدَرٍ وَلَا وَبَرٍ إِلَّا أَدْخَلَهُ اللهُ هَذَا الدِّينَ، بِعِزِّ عَزِيزٍ أَوْ بِذُلِّ ذَلِيلٍ، عِزاً يُعِزُّ اللهُ بِهِ الْإِسْلَامَ، وَذُلاً يُذِلُّ اللهُ بِهِ الْكُفْرَ»

په حقیقت سره به دا اسلام هغه ځایه پورې ورسیږي، چېرې چې شپه او ورځ رسیږي او هېڅ د خټو او خیمې کور به پاته نه شي، مګر دا چې الله سبحانه وتعالی یې خپل دین ته راوړي، یا به د یوشریف په شرافت باندې وي او یا به د سپک په سپکوالي باندې وي؛ هغه عزت چې په هغه باندې الله تعالی اسلام شریف کوي او بې عزتي چې په هغه سره الله سبحانه وتعالی کفر بې عزته کوي.

نو په الله سبحانه وتعالی چې القوي او العزیز ذات دی باور ولرئ او د الله تعالی په رسۍ پورې ځانونه ټینګ کړئ، د ټاکنو جرم او هغوی چې د دې مسوول دي، رد کړئ، همدارنګه د سرکښانو لپاره الله سبحانه وتعالی دا قول کافي دی.

[أَفَلَا يَتَدَبَّرُونَ الْقُرْآنَ أَمْ عَلَى قُلُوبٍ أَقْفَالُهَا * إِنَّ الَّذِينَ ارْتَدُّوا عَلَى أَدْبَارِهِمْ مِنْ بَعْدِ مَا تَبَيَّنَ لَهُمُ الْهُدَى الشَّيْطَانُ سَوَّلَ لَهُمْ وَأَمْلَى لَهُمْ * ذَلِكَ بِأَنَّهُمْ قَالُوا لِلَّذِينَ كَرِهُوا مَا نَزَّلَ اللَّهُ سَنُطِيعُكُمْ فِي بَعْضِ الْأَمْرِ وَاللَّهُ يَعْلَمُ إِسْرَارَهُمْ] (محمد۲۴-۲۶)

ژباړه: ایا دوی پر قران غور نه دی کړی، یا که پر زړونو یې قلفونه وهل شوي دي؟ حقیقت دا دی هغه کسان چې د هدایت له روښانه کېدو څخه وروسته په شا وګرځیدل، د هغوی لپاره شیطان دغه کړنلاره اسانه کړېده او د درواغجنو هیلو لړۍ یې د هغو لپاره اوږده کړېده. له همدې امله دوی د الله تعالی د نازل کړي دین بد ګڼونکو ته وویل، چې په ځینو چارو کي به موږ ستاسي حکم منو. الله تعالی د دوی په دغو پټو خبرو ښه پوهیږي.

حزب التحریر ـ د ولایه فلسطین مقدسه خاوره

(یوشلار) یا د ازبکستان د ملي راډیو تلویزیون د ځوانانو چینل د «اوسنۍ موضوع» تر سرلیک لاندې د ۲۰۲۱م کال، د اپرېل په ۱۶مه، یو پروګرام خپور کړ. په دې پروګرام کې د عمومي څارنوالۍ او نړیوالې اسلامي اکاډمۍ استازو برخه درلوده. اصلي موضوع دا وه چې د حزب التحریر نظریات تخریبوونکي دي، د خلکو تر منځ د نفرت او کرکې تخم شیندي او د اسلام په نامه خلک له لارې باسي. همدا راز حزب التحریر یې د ترهګرو ډلو په لېست کې ښکېل وګڼلو. د هغه مسلمانانو د پښیمانۍ ویډیو ګانې یې وښودلې چې د حزب غړي او یا هم د دوی له نظریاتو اغیزمن شوي وو. د دغه پروګرام په جریان کې دا هم وویل شول، کوم کسان چې د دوی عقیده او نظریه نه مني کافر یې بولي. همدا راز نور ناسم تورونه هم وو چې د شرعي مدارکو پر اساس نه وو ولاړ.

موږ ډیر ښه پوهیږو چې دغه پروګرامونه د ازبکستان د حکومت په غوښتنه جوړېږي، تر څو مسلمانان له حزب التحریر څخه ووېروي او منحرف یې کړي. همدا راز موږ په دې هم پوهیږو چې دا نه لومړنی تور دی او نه هم وروستی. له هر څه نه مخکې موږ غواړو یو ځلې بیا دا یادونه وکړو چې ټوله نړۍ پوهیږي چې حزب التحریر ترهګریز سازمان نه دی او دا یوه ډرامه ده چې د تروریزم ټاپه پرې لګیږي، په داسې حال کې چې تر اوسه هیڅ ثبوت هم نشته چې چیرته یې دې له زور زیاتي او قدرت څخه کار اخیستی وي.

 دا د ظالمو او جابرو حکومتونو دود دی چې داسې کلیمې وکاروي چې د اسلام او مسلمانانو، په ځانګړي توګه د حزب التحریر پر وړاندې اصلاً هیڅ واضح نه دي تعریف شوې. د حزب التحریر افکار، عقاید او احکام ټول په صحیح اجتهاد (فقه) له قران، سنت، د اصحابو له اجماع او قیاس څخه اخیستل شوي دي. چې په ازادو منابعو او د حزب په رسمي ویب پاڼو کې د لاسرسي وړ دي او هر څوک کولای شي چې په اسانۍ یې تصدیق کړي. که چېرته کومه موضوع واضح او د فهم وړ نه وي نو لطفاً زموږ د ویب پاڼې له لارې د راسره په اړیکه کې شي موږ تل بحث او خبرو ته چمتو یو.

په هر صورت، د دغه پروګرام ګډونوال چې د حزب افکار او عقاید یې نه دی مطالعه کړي هڅه کوي چې خلکو ته په دروغ ویلو او پر حزب په تورونو لګولو سره د ظالمانو رضایت ترلاسه کړي، ایا دوی له الله سبحانه وتعالی څخه نه ویریږي!؟ حزب التحریر هیڅکله هغو کسانو ته چې پر دوی باور لري دروغ نه وایي، برعکس هغه کسان چې پر حکومت باور کوي، حکومت یې استفاده کوي او له استفادې وروسته یې ليرې په اشغالو کې غورځوي.  همدا راز دا هم څرګنده ده چې زموږ هغه مسلمان وروڼه چې په دغه ویډیوګانو کې را ښکاره شول، تر تهدید او ګواښ لاندې د حزب مخالفت کوي ځکه چې دوی په ځانګړې توګه د امنیتي ځواکونو او پولیسو په واسطه دغه ډول پروګرامونو ته چمتو شوي وو. همدا راز دغه ادعا چې حزب هغه کسان چې د دوی افکار او عقاید نه مني کافر ګڼي، له دروغو او جعل پرته بل څه نه دي. بلاخره، موږ دغه پوښتنه مطرح کوو چې: آیا دغه شر، فساد او د خلکو په منځ کې د دښمنۍ خپرولو ته حزب التحریر لمن وهي یا  دغه خایین واکمنان، چې په زور او چل پر موږ تپل شوي دي او خپل آخرت یې د دنیا په مقابل کې پر کافرو نظامونو باندې پلورلی دی؟ ایا د حزب اشتباه داده چې د تاسو اصلي څېرې ښکاره کوي او مسلمانانو ته دا په ډاګه کوي چې تاسو اسلامي شریعت نه منئ او د کفر د قوانینو سره سم حکومت کوئ؟ ایا د حزب التحریر زرګونه مسلمانان مو د دې لپاره چې یوازې وایې الله سبحانه و تعالی زموږ رب دی زنداني، شکنجه او وژلي نه دي؟! په همدې ډول نورې ډیرې پوښتنې دي، چې هیڅ چا تر اوسه پورې صادقانه ځواب نه دی راکړی.

مسلمانان د حزب التحریر پیروي کوي، ځکه چې دوی ته اسلام د یوې ایډیولوژۍ په توګه تشریح کوي او دوی له حزب سره د کار کولو تصمیم نیسي. د تاسو کمزوری انکار هم ژوند ته د اسلام د راستنیدو مخه نه شي ‌ډب کولای. حزب التحریر به دغه لارې ته د خپل ځان او مال په مقابل کې دوام ورکړي، تر څو د الله سبحانه و تعالی دغه امر تحقق ومومي. الله سبحانه وتعالی فرمایي:

 [وَقُلْ جَاء الْحَقُّ وَزَهَقَ الْبَاطِلُ إِنَّ الْبَاطِلَ كَانَ زَهُوقاً]

ژباړه: «او اعلان وکړه چې: حق راغی او باطل له منځه لاړ، باطل له منځه تلونکی دی.» [اسرا: ۸۱]

د حزب التحریرـ ازبکستان مطبوعاتي دفتر

د افغانستان د بهرنیو چارو وزیر محمد حنیف اتمر د ثور په اتمه په یوه خبري کنفرانس کې وویل چې له خپل چیني سیال سره یې «ښې خبرې» لرلې. د  هغه په خبره له ترهګرۍ سره د مبارزې په برخه کې د افغانستان له امنیتي او دفاعي ځواکونو د چین د ملاتړ مسأله په جدي ډول مطرح شوه او د چین ځواب «ډېر مثبت» و، خو دا موضوع په سیمه کې د لوی (جیوپولټیک) بدلون په مانا نه ده. اتمر وايي چې افغانستان تل له سیمې او چین سره د ترهګرۍ ضد مبارزې په برخه کې همکاري کړې او چین له ترهګرۍ وېره لري.

دا څرګندونې یو ځل بیا ښيي چې افغان چارواکي څومره لاسپوڅي او له اسلامي او انساني ارزښتونو خالي فکر لري. په داسې حال کې چې د امریکا او ناټو په مشرۍ شل کاله له «ترهګرۍ» سره جګړه ټولو ته څرګنده شوې ده چې دا په سیمه کې له اسلامي ارزښتونو او مسلمانانو سره له مبارزې پرته بل څه نه وو او سلګونو زرو افغانانو ته یې مرګ‌ژوبله، ځاني او مالي زیان واړاوه. اوس چې امریکايي اشغالګر له ذلیلانه ماتې وروسته له افغانستان څخه د وتلو په هڅه کې دي، دغو باد راوړو او د لوېدیځ مزدورو چارواکو درک کړې چې د امنیتي ځواکونو د تمویل او تجهیز په برخه کې له ستونزو سره مخ شوي او آن په هوا کې پاتې شوي دي او ژر به د افغانستان د پخوانیو چارواکو په شان له ذلیل برخلیک سره مخ شي. په همدې خاطر هڅه کوي چې د خپل ځان لپاره نوي سیمه‌ییز ملاتړي او تمویل کوونکي ولټوي.

د افغانستان خاین چارواکي په دې سیاست سره له یوه اړخه غواړي چې د امریکا او چین په نړیواله سیالۍ کې امریکا او لوېدیځ ته دا پیغام ورکړي چې که تاسې د افغان امنیتي ځواکونو په تمویل او تجهیز کې همکاري نه کوئ، نو ستاسې سیالان حاضر دي چې په ډېره لېوالتیا دا تشه ډکه کړي. له بله اړخه له خپلو پخوانیو چارواکو اندېښنه لري او د هغوی د مکر د مخنیوي لپاره زیاتوي چې دا موضوع په سیمه کې د لوی (جیوپولیټیک) بدلون په مانا نه ده.

خو تر دې ټولو مهمه دا ده چې د امریکا او ناټو په شان د چین لاسونه هم د بې رحمه قصاب په شان د مسلمانانو په وینو سره دي. همدا اوس یې میلیونونه ایغور مسلمانان په کمپونو کې بندي کړي او د اسلام د پرېښودو لپاره یې پر هغوی وحشت او وېرې ته دوام ورکړی دی. د شرقي ترکستان مسلمانان یې په خپله خاوره کې بندیان کړي دي، څو هر ډول عبادت او اسلامي مراسم پرېږدي. د شرقي ترکستان هرې مسلمانې او متدینې کورنۍ ته یو چینايي مامور ټاکل شوی دی، چې د ژوند ټول چارې یې وڅاري او که چا لمونځ کاوه، روژه یې نیوله، ږیره یې پرېښودله، حجاب یې کاوه او یا یې په کور کې قرانکریم او جای‌نماز پیدا کېده، ژر به د چین دولت ته خبر ورکوي چې هغوی ته جزا ورکړي. 

نو؛ چین د امریکا، ناټو هېوادونو او روسیې په شان له مسلمانانو سره باالفعل محارب دی او ورسره هر ډول معامله قطعي حرامه او د دوو میلیاردو مسلمانانو له عقیدې او شرعي ګټو سره خیانت دی. دا هغه چاره ده چې د اسلامي هېوادونو خاینو مشرانو ورته هېڅ اهمیت نه دی ورکړی او نه یې ورکوي. پر دې اساس دا د افغانستان د لاسپوڅو چارواکو بل ښکاره او منافقانه جنایت دی چې غواړي د افغانستان مسلمانان د اشغال او استعمار بلې کندې ته ور وغورځوي او په دې ډول ذلیلانه کړنو سره خپل واک او لړزانده نظام ته پاېښت ومومي.

د حزب‌التحریر - ولایه افغانستان مطبوعاتي دفتر